قصيدة تخاطيف

مهداة الى الشاعر مهدى صـلاح

1- مراوغة

ماتسيبش نفسك للمرايه بسهولة كده

وخليها تتمنى تشوفك

اعمل انك مش واخد بالك طنش وماتقعش فى اى فخ

لاتقول أطمن على التسريحه او اظبط القميص

كلها حجج بس عشان تدى لروحك أوصافها من المرايا

اللى حلفت بكل اللى بص عليها انها هاتخــبيك أول ماهتبص بجد


2- ملاوعة

ماتقولش ولا كلمة

وامشى على طول اعمل انك مش متأثر خالص

اتكلم بشكل منظم فى أى موضوع

بس خليك حريص جدا

من أى ضحكة عشان ماترجعش تعـــــــيط وتفتكر

3- سبب

لوقلت من الاول ؟؟؟؟؟

مش كنت عملت استعداد نفسى لكل الحواديت

اللى بتقع فوق دماغك

4- مواجهة

مش عايز تنام ؟

وخايف للدرجة دى ؟

هى خلاص عرفت انك مسافر

وماعادتشى تجيلك ف الاحـــــــــــلام