منديل ورق غرقان دم ومرمى فى نص الطريق
وما اعرفش مين بالظبط اقنعنى انه وردة ؟
مضايق جدا من أول ماشفته
أزاى الناس ترميه بالطريقه دى؟؟؟
وازاى مش حاسين بجمال منظره
مع شويه رتوش بسيطه ممكن نعمل جو رومانتيكى هايل
او ندخل المنديل نفسه فى حكايه هو مالوش ذنب فيها
كل دا ولسه ماوصلتش لحده
بس بافكر
الناس بجد مش واخدين باللهم منه
ولا تلاهـــى الدنيا ناسيتهم يحتفلوا بورده قررت تنتحر
من إيد واحد كان مع حبيبته وأول ماقرب منها
غارت الوردة ومالقيتش قدامها حل الا انها تنتحر
وكل اللى معدى مش واخد باله منها
ولا حتى بيبص عليها
او يحاول يركنها على جنب
خلاص
انا خت باللى وجى اخدها واحطها ف كبايه ميه بسكر
يمكن تتبسط الكام ساعه الباقين
أقرب
واحس بالخطر
احس كمان انى باعيط على كل اللى بيحصل حوليا
اطلع منديل ورق
وامسح دموعى
امد ايدى اخد الورده وبحنيه مش متعود عليها خالص
يقع المنديل من ايدى
واكمل مشى
